聆訊告一段落，一班旁聽同守候嘅同路人快步走向出口，等候即將出庭嘅手足。入到去法庭旁聽嘅同路人，向其他係出面守候嘅人講返結果，大家知道情況，都稍稍鬆一口氣。經過今場審訊，儘管手足仍背負住莫須有嘅控罪，但總算唔再困係不見天日嘅臭格，可以見返親友。眾人既為手足既將出尼而雀躍，亦為未來漫長嘅保釋、再審而感到不安。相比起被捕後寢食難安、音訊全無、毫無私隱與自由嘅四十八甚至更長嘅小時，相比起上庭審訊嘅焦躁緊張、等待命運被宣判嘅半日，散庭後嘅等待不過係微不足道嘅半個鐘，但呢份等待一樣係咁漫長、咁憂心、咁坐立不安。或者，呢份苦痛，正係在權勢者對追求真理、公義嘅無權勢者嘅懲罰同報復 — — 用無權勢者嘅時間同生命，換取穿鑿附會嘅搜證、司法機關嘅濫用。
法院職員開始叫名，被叫到名嘅手足嘅親友走近出口。而其他同路人都係旁邊準備好遮、口罩、太陽眼鏡等物資，以掩護即將出庭嘅手足。見到簽署緊文件嘅手足，有親友忍唔住落淚，一邊收集物資，幫手足整理好儀表，緊緊抱住佢咁離開。離開之際，雙眼通紅嘅親友望住我講左句：多謝你地。我無言以對，眼眶開始發熱，只好輕輕點頭，一邊撐開雨傘跟隨，好讓手足唔使暴露係閃光燈之下。
被捕，係不幸嘅事。而孤身上庭、孤身離開，係更難過嘅事。不少家長唔願意理解子女追求公義嘅心，即使子女被捕而下落不明、甚至鬧上新聞，都不屑一顧。亦有人缺乏理念相近嘅朋友，只係憑一顆真誠嘅心走上抗爭路，以致不幸出事，都無人探問。獨自走出法院嘅手足低住頭，睇唔到表情。但就算再堅強嘅人，冇人可以互相扶持、吐露心聲，對身心都係一大打擊。心裡難過嘅同路人不忍手足獨自離開，跟上接載手足嘅車。唔知道兩位素未謀面嘅陌生人會唔會覺得尷尬，唔知道最後佢地係咪揮揮手就兩忘於江湖，但我願意相信，係呢個車程中，兩位都為對方帶來一點溫暖。
送完手足，我仍然冇辦法忘記果聲多謝、果對發紅而濕潤嘅雙眼、果位冇親友關心嘅手足。我唔認為自己做嘅事值得多謝，對比起受到被捕、上庭、審訊等終點未明嘅苦難，我只係做緊幸運嘅人可以做到嘅事，風險唔高嘅卑微嘅事。但，即使係咁微小、不被看見嘅事，仍然係無比重要、有意義嘅事。
自從疫情爆發，大家都忙於抗疫、無暇關注抗爭，會親身聲援手足嘅人亦越來越少，唔再好似之前橫風橫雨都有千百人出尼支持手足。正正係呢啲開始淡忘手足嘅時候，更顯得關心彼此係幾咁重要。雖然法院聆訊暫時都因應疫情而延期，但之後仍然會有上庭審訊嘅手足，仍然有還押在囚嘅手足，需要同路人嘅關注同支持。我地仍然有唔少可以做嘅事，願大家毋忘未竟之業，堅持並守護彼此。
資助還押手足零食/ 日用品計劃：
//「用勝利為我平反就是最好的禮物」
依一句，係我哋一位好朋友喺收押所寫俾我哋嘅說話，亦係令我哋最刻骨銘心嘅一句，希望今日轉贈俾所有同行兒女。
我哋今日推出嘅>>資助盒系列<<，並唔係一張俾大家好過啲嘅「贖罪券」，大家務必要搞清楚：只有堅持到勝利一刻，先係對雨傘革命義士、魚蛋革命義士、被捕手足、還押手足同烈士嘅最好嘅交代。//
聲援手足：
被捕人士關注組：（因應疫情，法院聆訊暫告延期，但仍會處理緊急聆訊，請多留意頻道的聲援消息）
https://t.me/s/youarenotalonehk
被捕人士收信部：（主要貼出還押手足寫的信，可多了解還押手足心聲）
被捕人士相關記錄片段：
片段中，星火嘅探訪者話，係探監嘅時候係唔會問還押手足過成點，因為點會過得好呢，冇自由，一定係難過嘅。而作為探訪者，可以做嘅就係講多啲出面嘅世界，讓佢地期待快啲出尼玩呢隻game、睇呢套戲，讓佢地有動力、有希望。未必可以探訪嘅各位有心人，可以藉書信，為手足帶來動力與希望。
只有17歲嘅被訪者，展現出嘅係對還押手足嘅無比尊重、理解同愛。
除了上庭聲援以外，亦可寫信給還押手足，為他們送上溫暖。
以下是一些收集信件的途徑，注意事項可參考此文章。
- 抗爭點滴 Stories of Resistance（為初一及反送中手足智駒、隊長、發仔等收集信件）
地址：九龍中央郵政局郵政信箱70320號（PO Box 70320, Kowloon Central Post Office)
（就近日帖文所見，手足心情相當低落，希望大家可幫忙寫信為手足打氣）
- 星火同盟（為一眾手足收集信件，包括比達、老湯等，部分不具名）
地址：九龍尖沙咀郵箱98697號
- 邵家臻議員（為一眾不具名手足收集信件）
地址：香港金鐘立法會綜合大樓1018室，邵家臻議員辦事處收
- 影攝食（初一手足光明兄）
可經星火同盟或本土新聞轉交，本土新聞地址為：新蒲崗大有街 2 號旺景工業大廈 12/F, F室、本土新聞、盧建民收
地址：郵政總局郵政信箱 8632 號 P.O. Box 8632, General Post Office
最後，未敢忘記：
新屋嶺慘案真相之一 Truth of San Uk Ling Inhumane Torture (1) — English subtitle available
新屋嶺慘案真相之二 Truth of San Uk Ling Inhumane Torture (2)
新屋嶺慘案真相之三 Truth of San Uk Ling Inhumane Torture (3)
如這篇文章有幸接觸到你，願你可以行動抵抗遺忘，捍衛真相與公義，一同見證我城的未來。
如你願意支持我繼續努力，可以請我一杯咖啡☕
已開設Patreon，歡迎支持我繼續書寫香港、支援同路人
